(2)ابن حاتم میں ہے جو بھی حضرت یونس علیہ الصلوٰۃ والسلام کی اس دعا کیساتھ دعا کرے اس کی دعا ضرور قبول ہوگی۔(3)ابو سعید رحمۃ اللہ علیہ فرماتے ہیں کہ اسی آیت میں اس کے بعد ہی فرمان ہے اسی طرح مومنوں کو نجات دیتے ہیں۔(4) ابن جریر میں حضورﷺ فرماتے ہیں۔ خدا کا وہ نام جس سے وہ پکارا جائے قبول فرمالے اور جو مانگا جائے وہ عطا فرمائے وہ حضرت یونس علیہ الصلوٰۃ والسلام کی دعا ہے۔(5)حضرت سعد بن ابی وقاص رضی اللہ عنہٗ فرماتے ہیں میں نے کہا یا رسول اللہﷺ وہ دعا حضرت یونس علیہ السلام کیلئے ہی خاص تھی یا تمام مسلمانوں کیلئے جو بھی یہ دعا کرے۔ آپﷺ نے فرمایا کیا تو نے قرآن میں نہیں پڑھا کہ ہم نے اسے غم سے چھڑایا اور اسی طرح ہم مومنوں کو چھڑاتے ہیں پس جو بھی اس دعا کو کرے اس سے اللہ تعالیٰ کا قبولیت کا وعدہ ہوچکا ہے۔(6)ابن ابی حاتم میں ہے کہ کثیر بن سعیدرحمۃ اللہ علیہ فرماتے ہیں کہ میں نے امام حسن بصری رحمۃ اللہ علیہ سے پوچھا کہ ابوسعید اوہ اسم اعظم کہ جب اس کے ساتھ سے دعا کی جائے‘ سوال کیا جائے تو اللہ تعالیٰ قبول فرمالے اور جب اس کے ساتھ اس سے سوال کیا جائے تو عطا فرمائے۔ وہ کیا ہے؟ آپ نے جواب دیا برادر زادے کیا تم نے قرآن کریم میں خدا کا یہ فرمان نہیں پڑھا۔ پھر آپ نے یہی دو آیتیں تلاوت فرمائیں اور فرمایا بھتیجے یہی خدا کا وہ اسم اعظم ہے کہ جب اس کے ساتھ دعا کی جائے تو قبول فرماتا ہے اور جب اس کے ساتھ اس سے مانگا جائے تو عطا فرماتا ہے۔ (تفسیر ابن کثیر جلد۳، ص ۹۶، ۳۹۵)۔(7)حدیث شریف میں آیا ہے جس کا مفہوم ہے کہ جس مسلمان نے اپنی بیماری کی حالت میں چالیس مرتبہ مذکورہ بالا آیت کریمہ پڑھ لی تو اگر اس بیماری کی حالت میں وفات پاگیا تو چالیس شہیدوں کا اجر پائےگا اور اگر تندرست ہوگیا تو اس کے تمام گناہ بخش دیئے جائیں گے۔ (حصن حصین، ص:۲۴۱)۔اس وقت امت کو مجموعی طور پر اور انفرادی طور پر توبہ و استغفار کی اشد ترین ضرورت ہے۔ اپنے لیے اور پوری امت کیلئے بھکاری بن کر اللہ کریم سے گناہوں کی معافی اور عذاب سے بچنے کیلئے دست دراز کیجئے۔ جھولی پھیلائیے۔ اللہ کریم ہمیں اور پوری امت کو معاف فرمادے۔ اللہ کریم سے سارے انسانوں اور جنات کیلئے قیامت تک کیلئے استغفار کیجئے اپنے آپ کو بے بس اور مجبور جان کر سب کی ہدایت اور دنیا آخرت میں برکت و عافیت کی بھیک مانگے۔